Nie każdemu Wolno
P-000001620
[69 + 2] л. ; 4° (25 × 16,7 × 0,9 см)
Аўтар рукапісных вершаў і апавяданняў прадстаўляе панараму жыцця беларускай правінцыі другой паловы XIX ст. Тэматыка вершаванага зборніка пераважна жартоўная або маралізатарская.
Фаліяцыя не прастаўлена (службовая алоўкам): I-II, 1-67 (60-67 чыстыя), I-II л. Лісты ў двайной рамцы, чарніла карычныя і фіялетавыя. Акуратны почырк адной рукой. Змест: у сшытку 34 пранумараваныя рымскімі лічбамі датаваныя творы пачынаючы з 1860 па 1886 г. Пад вершамі маюцца подпісы, зробленыя ў м. Новая Мыш пад Баранавічамі, Гарадзішчы і Любанічах (Наваградчына), Лунін (Палессе), Сакольшчыне, Skrobów (Польска), Грыбаўшчызне, Пінску. На л. 50–59 прытча: "XLV. Powieść O babie i zabie". У рукапісу змяшчаецца ўкладка на 2 нн. л. з паэтычным тэкстам: "Raj i piekło (28 мая 1888 r. // M. Horodysze) / F. C.".
Паўскураны пераплёт (ХІХ ст.): кардон, каляровая папера, скураная спінка. На верхнім вечку наклеены паперовы ярлык з загаловкам: Nie Każdemu Wolno.
Папера: у верхнім правым вугле адціснуты сляпы штэмпель з цісненнем: Нововерская Фабрика № 5 [Новые Верки, г. Вильнюс] (Участкина, З.В. Развитие … 1972, с. 171).
Дэфектнасць: адсутнічаюць лісты з вершамі пад нумарамі: XIII–XV, XVII–XVIII, XXIII–XXVII, XLII. Форзацы ў рагах ад вады; папера – сляды цвілі. Папера пераплёта мае абрывы, пацёртасці.
На л. [I] запіс: Siakie-takie utwory Niedołęgi autora. Рукапіс створаны ў Беларусі. Рукапіс атрыманы ў дар у 2021 г. ад прыватнай асобы.